Тепачка во Соколански парк, двајца повредени, жителите вознемирени

Како што соопштува МВР, тепачката се случила ноќеска во 1.30 часот, а кај нив била пријавена денеска во 11. 45 часот. 

 „Д.Т.(39) и И.И.(42) двајцата од Куманово пријавиле дека во Соколански парк во Куманово биле физички нападнати од неколку лица. Се преземаат мерки за расчистување на случајот“, стои во полицискиот билтен.

И од Итната медицинска помош во Куманово потврдија дека ноќеска имале интервенција кај Соколанскиот парк, при што транспортирале двајца повредени. Едниот со повреди на главата и окото, а другиот на ногата и раката.

Жителите кои живеат во околината на паркот  кои се јавија во нашата редакција и испратија фотографиии, кажуваат дека физичката пресметка многу ги вознемирила, поради што повикале полиција.  

„Ова не е изолиран случај. Метеж, гласна музика, караници, физички пресметки, бучава од мотори се секојдневна појава која не вознемирува и често не остава без сон. Затоа бараме на овој реон да има почесто полициска патрола за да не доаѓа до вакви појави“, вели нашата соговорничка. 

Соколанскиот парк е популарно собиралиште на млади лица, особено во летниот период е фреквентно цела ноќ.