Да поминуваат на пешачки премин и да не претрчуваат улица, МВР со апел до учениците на почетокот на учебната година

Полициски службеници од Отсекот за превенција при СВР Куманово, на првиот училишен ден од новата учебна 2022/2023 година ги посетија основните училишта на подрачјето на општина Куманово, во рамки на проектот „Безбедни училишта“. При тоа, како и секоја година полициските службеници им посакаа успех и безбедна учебна година на сите ученици, а во непосредните разговори со учениците им беа презентирани низа важни сообраќајни поуки, како и сообраќајните правила и прописи чие што почитување е од пресудна важност во остварувањето на безбедноста во сообраќајот.

„На децата особено им беше укажано за нивната обврска за почитување на сообраќајните правила и прописи како пешаци, односно безбедно движење по тротоар, преминување на улица на пешачки премин, следење на сообраќајните знаци, и на семафорите. Исто така, од страна на полициските службеници беше остварена средба и со одговорните на училишните тимови за безбедност и директорите во училиштата, каде беше разговарано за продолжување на заедничката соработка во натамошниот период, а во рамки на проектот „Безбедни училишта“, соопштуваат од МВР.

Сообраќајна култура е предуслов за безбедни ученици, кои со почетокот на учебната година се најчести пешаци на кумановските улици. 

 О. Пешевска