Вечерва во 22.48 часот во Куманово и на северната хемисфера календарски ќе пристигне зимата

Вечерва, на 21 декември, среда, на 355-иот ден во годината според грегоријанскиот календар, во Македонија, во Куманово и на целата северна хемисфера, календарски ќе започне зимата, додека на јужната ќе настапи летото. До крајот на оваа 2022 година остануваат уште само 10 дена.

Зимата на северната хемисфера вечерва официјално ќе пристигне во 22 часот и 48 минути по средноевропско време и ќе трае до 20 март 2023 година до 22 часот и 24 минути, кога кај нас ќе започне пролетта. Должината на зимата ќе трае 89 дена, 21 часа и 12 минути.  

Секоја година, планетата Земја движејќи се на својот пат околу Сонцето ќе се најде и ќе помине во две точки кои се нарекуваат солстициум. Постојат два солстициума. Едниот е во месецот декември (зимски),  а другиот во јуни (летен) и ги означуваат почетоците на годишните времиња зима и лето. На овој датум (21 декември), денешниот зимски солстициум, кога кај нас започнува годишното време зима, го означува најкраткиот ден северно од екваторот, а најдолг ден јужно од нултиот напоредник. Овој ефект е најголем на локации кои се оддалечени од екваторот. Во тропските предели најкраток ден е нешто помалку од 12 часа, во умерените појаси е значително пократок, а местата во Арктичкиот круг доживуваат поларна ноќ, кога Сонцето воопшто не изгрева.  Спротивно на тоа, ноќта кај нас е најдолга. На 21 декември пладневното Сонце е на својата најниска позиција на хоризонтот и ќе започнува да се искачува до наредниот 21 јуни, кога на северната хемисфера тогаш ќе настапи летото.

Утрово, Сонцето во Куманово изгреа во 06 часот и 58 минути, а зајде во 16 часот и 04 минути. Денот траеше 09 часа и 06 минути, додека ноќта 14 часа и 54 минути.

Веќе од утре, денот ќе започне да се зголемува континуирано за во просек по две-три минути на ден, а на сметка на тоа, ноќите да се скратуваат – сé до 21 јуни наредната година.  

Растојанието на Земјата од Сонцето на денешен ден изнесува околу 147, 176 милиони км.

И пред крај уште нешто интересно да напоменеме за нашиот град Куманово во врска со зимата – апсолутна минимална температура во нашиот град е измерена на 27.01.1954 година, кога тогаш е измерен апсолутен минимум од -24 ⁰C.

Што се однесува до снежната покривка, на 2 февруари 1962 година во Куманово се измерени 70 cm снежна покривка, додека пак најдолго непрекинато траење на снежна покривка во Куманово траело 77 дена ( од 21 декември 1953 – до 7 март 1954 година).

И за крај, да споделиме некои убави и интересни цитати за зимата.

-„Зимата е како жена – има добри и лоши страни. Можете да ги видите  нејзините      добри страни и да ги почувствувате нејзините лоши страни. " Ѓорѓе Балашевиќ

• „Ноќите беа долги, како плетенките на убава девојка, а деновите кратки, како смислата за хумор на таа девојка“. - Евгениј Замјатин
• „Добрината е како снег - разубавува сè што покрива“. Калил Џибран
• „Еден убав збор може да загрее три зимски месеци“. Јапонска поговорка
• „Ниту една зима не трае вечно; ниту една пролет не го прескокнува својот ред.’’ Хал Борланд
• ,,Среде зима открив дека во мене има непобедливо лето.’’ Албер Ками
• „Пролетта, летото и есента не исполнуваат со надеж. Зимата не потсетува дека требаше да се погрижиме за нашата кондиција“. Мињон Меклафлин

 

Извор:

https://www.timeanddate.com/

А. Лазаревски – Клима на Македонија, Скопје, 1993.

Извор на фотографија: mia.mk

Филип Ѓошевски – дипломиран географ на Институт за географија - ПМФ