ВМРО-ДПМНЕ со план за поголема достапност и отвореност на Советот кон граѓаните

„Претплатата за мобилни телефони се плаќа од Општина Куманово и треба да бидат јавно достапни за сите сограѓани. Службените мејл адреси треба да се активираат и да бидат достапни за сите заинтересирани“, велат од ВМРО-ДПМНЕ и коалицијата.

Планот е конципиран во две фази. Првата фаза би се имплементирала во наредните 60 дена, а планот би почнал да се применува од почетокот на 2023 година. Предлагачите велат дека за негова реализација не се потребни никакви дополнителни финансиски средства. За некои од точките дал согласнот и ИТ секторот од општинската администрација и планот бил оценет како спроведлив и одржлив.

„Секој повик и секое прашање на граѓаните заслужува одговор. Секое делче од Куманово треба да биде посетувано редовно од советниците и секако треба поголема заложба и волја за решавање на одредени проблеми“, изјави Елена Доцевска-Божиновска, координатор на советничката група на ВМРО-ДПМНЕ и коалицијата и еден од иницијаторите на проектот.

Редовни средби со таргет групи како пензионери, таксисти, спортисти, угостители, би овозможиле да се чуе и нивниот глас и да се алармира за нивните секојдневни проблеми во животот и делувањето. Посета на месни и урбани заедници со мешани групи по национална, верска и политичка припадност, достапност и видливост на целокупниот материјал за седниците на Советот се некои од предлозите на локалните советници од редовите на ВМРО-ДПМНЕ.

„Материјалите кои пред седница ги добиваме само ние советниците и не се достапни до граѓаните и медиумите, што сметаме дека е сериозен пропуст и проблем. Затоа, бараме тие транспарентно да се објават на официјалната веб страница на Општина Куманово и секој кој има пристап да даде сугестија или предлог што би се разгледале пред да пристапиме кон одлучување за тие прашања“, објаснува Доцевска - Божиновска.

Меѓу предлозите е и да се создаде и публикација „Мој советник“, по примерот на „Мој пратеник“, кој статистички би можела да се следи активниста и агилноста на секој советник. Публикацијата би содржела податоци за редовно присуство/одсуство на седниците,земен збор, предлозите што ги доставил советникот и колку бил ангажиран и достапен со своите советнички
обврски им излезе во пресрет на барањата на граѓаните. Статистиката би се објавувала на секои 6 месеци и би била достапна и видлива на целокупната јавност.

Втората фаза би започнала откако првата целосно ќе се стави во функција и ќе заживее. Планот го доставуваат со убеденост дека ќе наиде на поздрав и прифаќање од сите советнички групи, без простор за политички калкулации и пресметки. Целта е унапредување на демократскиот капацитет и транспарентноста на институциите.