Во населбата Карпош да се изгради зелен пазар, предлага советникот Петковски

Тој вели дека продавачите на „дивиот пазар“ немаат елемантарни услови за работа, нивните возила се на улица и ја загрозуваат безбедноста на сите учесници во сообраќајот, а не се запазени ни хигиенско-техничките услови за работа со храна.

Иако повремено се преземаат одредени мерки за отстранување на камионите тие набрзо се враќаат и продолжуваат со работа.

„Ова покажува дека во овој дел на градот, како и на населението кое секојдневно поминува на оваа раскрсница, кон другите населби и општината Старо Нагоричане е потребен пазар. Затоа ве прашувам дали е во план изградба на пазар во населбата Карпош, бидејќи станува збор за многу голема населба“, праша Петковски.

Градоначалникот Максим Димитриевски одговори дека идејата е добра и треба да се размисли за неа, па доколку ЈП „Пазаришта“ има интерес и можност да ги прошири своите капацитети, тој ќе ја поддржи.

„Треба да се најде атрактивна локација и може да работиме на тој проект. Искуството покажува дека истурените пазари работат нерентабилно, но доколку советот даде одобрение ние ќе работиме на случајот“, кажа Димитриевски.

Тој додаде дека инспекциските служби редовно излегува на терен и ги казнува продавачите на т.н. „диви пазари“, но побара поголема соработка со МВР за да се реши проблемот.

(С.Н.)