Зачленете се во нашиот клуб на читатели и најновите текстови ќе ги добивате на вашата мејл адреса
Голема акција за пролетно чистење наречена „Генералка викенд“ ќе биде спроведена на 7 мај (петок) во општина Куманово, во рамките на проектот „Зелена сончева“, кој го спроведува Man and Mountain LLC од Австрија.
Во организацијата на акцијата е вклучена и локалната самоуправа, Секторот за комунални работи, инфраструктура, сообраќај и заштита на животната средина, ЈП„Чистота и зеленило“, припадници на АРМ и НВО„Кумановски акцијаши“.
„Во акцијата сме здружени и со ПАКОМАК, Министерството за животна средина и просторно планирање, Министерството за земјоделие и шумарство, 9 општини, училишта и локални поддржувачи, професионални и аматерски спортски клубови и Делегацијата на Европската Унија со една цел: викендот да ни биде #За чисто како дома исто“, велат Гордана Манасијеска и Ханес Јаецкл од Man and Mountain .
Акцијата ќе се спроведе на локација кај Градскиот кеј, а собраниот отпад ќе се складира во поставени станици на „Пакомак“. Истовремено, ќе се чисти и депонијата кај маркетот „Туш“ со механизаицја и со помош на АРМ.
За секои собрани 10 килограми отпад ќе биде обезбедена по една садница и ќе се засади по едно дрво, а монументалната шума ќе биде наречена „Сончева гора“.
Во акцијата можат да се вклучат сите граѓани, а целта е ре-обнова на земјата со отстранување на отпадот од минатото и создавање еколошки одржлива иднина.
„Ќе ја мериме тежината на собраниот отпад и врз основа на овие бројки, ќе објавиме графикони засновани на соодносот „СОБИРА-ОТПАД-ПЕР-КАПИТА“. Потоа ќе ја објавиме „Општината на годината со најмногу совесни граѓани за животната средина“, велат од Man and Mountain.
На 7, 8 и 9 мај, акцијата „Генералка викенд“, освен во Куманово, ќе биде спроведена и во општините Крушево, Охрид, Дебар, Демир Капија, Гевгелија, Крива Паланка, Струмица и Велес.