Oд утре почнуваме со протести, најавија културните работници

„Платата за март во културата не е исплатена. Сите законски рокови се пробиени и три илјади вработени во културата уште немаат земено плата“, велат културните работници. 

Денеска Советот на Синдикат за образование, наука и култура на вонредна седница едногласно одлучил во понеделник да се организира протест на вработените од културните институции. Протестот е закажан за 11 часот пред Министерството за култура, а ќе биде поддржан и до останатите гранкови синдикати.

Како основна причина е наведена неисплаќањето на платата за месец март 2024 година.

„Неисплаќањето на платите на вработените во институциите кои извршуваат културна дејност е она што го предизвика незадоволството на нашите членови и реакцијата на синдикатот. Североисточниот регион има 3 илјади членови, во тритте гранкови синдикати- образование, детска заштита и култура и сите застануваме зад барањата на колегите. Преставници од сите установи и институции ќе се придружат и ќе го поддржат протестот на работниците од културата“, истакна Цветанка Митевска, претседателка на огранокот на Североисточен регион на СОНК.

Донесена е одлука и за отпочнување со процедура и организација за Генерален штрајк во сите установи од дејноста култура.

Доцнење со исплата на личните доходи значи и прекин на здравствено осигурување на работниците. Синдикатот на културни работници реагира и затоа што нема да има зголемување на плата од 12 посто, согласно Општиот колективен договор и Колективниот договор за култура.

Советот на СОНК изрази огромна разочараност од едностраното прекинување на социјалниот дијалог од страна на Министерството за култура.