Зачленете се во нашиот клуб на читатели и најновите текстови ќе ги добивате на вашата мејл адреса
Центарот за вработување од Куманово, во согласност со Оперативниот план, објави повик до заинтересираните невработени лица и работодавачи за учество во мерката субвенционирање на вработување, чија цел е поддршка за вработување на невработени лица кои потешко се вклучуваат во пазарот на трудот.
„На работодавачите им се доделува финансиска помош за исплата на бруто плата во износ од 19.000,00 денари месечно, за период од 6 месеци, со обврска да го задржат лицето во работен однос дополнителни 12 месеци. Во тек е повикот до микро, малите и средните претпријатија, како и до социјални претпријатија и граѓански организации кои сакаат да го прошират и развијат сопствениот бизнис, со отворање на нови работни места“, велат од Центарот за вработување во Куманово.
Во тек е и повик за втора мерка, финансиската поддршка за вработување на лице на возраст над 29 години и таа изнесува 92.000 денари, додека за вработување на лице до 29 години возраст поддршката изнесува 153.750 денари. Воедно, за вработување на лица кои се корисници на гарантирана минимална помош и за невработени лица Роми, финансиската поддршка изнесува 200.000 денари, а за жени Ромки со завршено средно или високо образование поддршката изнесува 220.000 денари.
Повикот е отворен до 12 јуни годинава, а сите информации можат да се добијат во Центарот за вработување во Куманово.
Зачленете се во нашиот клуб на читатели и најновите текстови ќе ги добивате на вашата мејл адреса
