Вонредна седница на Советот на Општина Куманово за доделување помош на настраданите во земјотресот во Турција и Сирија

Предложено е висината на помошта да изнесува 1 милион денари, кои ќе се обезбедат од тековните резерви на буџетот.

„Од средствата на Буџетот на Општина Куманово за 2023 година, од Програмата АОО – Совет на Општина Куманово, ставката 413 – Тековни резерви (разновидни расходи), да се исплатат парични средства во износ од 1.000.000 денари, со намена - помош за настраданото население од катастрофалниот земјотрес во Турција и Сирија кој се случи на 06 февруари 2023 година.
Средствата во износ од 1.000.000 денари ќе бидат распоредени по 500.000 денари на двете држави“, стои во Предлог- Одлуката  до Советот.

Повеќе градови од земјава веќе определија помош во пари, материјални средства и луѓе, а дел од нив и веќе тргнаа кон погодените подрачја. Од Заедницата на единиците на локалната самоуправа (ЗЕЛС) побараа сите општини да испратат помош за Турција.