Завеани и непроодни патишта во североисточниот регион

Во општина Старо Нагоричане се расчистува патот меѓу селата Дејловце и Длабочица, а во наредните денови предвидено е да се расчистуваат патните правци во Козјачијата и тоа: Жегљане – Малотино –М’гленце, Арбанашко – Рамно - Буковљане и Цветишница.

Во општина Ранковце регионалниот патен правец кон село Герман е непрооден поради големи снежни наноси.

Во општина Крива Паланка регионалниот пат кон село Огут е прооден со теренски возила. Сообраќајот на сите државни патишта се одвива тековно по влажни коловози, а на повисоките места, наместа со остатоци од кашест снег. Слаб снег провејува во Крива Паланка, Страцин и на планинскиот премин Стража.

Во општина Кратово сообраќајот во планинскиот дел не се одвива поради паднатиот снег во висина од 50 см. На патниот правец Злетово - брана Кежовица кај село Којково, има свлечено поголема количина на земја и сообраќајот е во прекин. На регионалниот пат Куманово-Кратово кај излезот на село Железница има попуштеност на асфалт во должина од 10 м и се поставени знаци за предупредување.