Земјоделците да ги легализираат тракторите

Земјоделците кои немаат никаков документ за механизацијата која ја поседуваат треба до суд да поднесат предлог барање за легализација, и изјава заверена на нотар во која ќе наведат марка, тип на трактор, број на шасија и слично. За три дена судот на увид ги доставува документите во Министерство за земјоделство, се објавува на огласна табла и за 30 дена добиваат решение. Земјоделците кои тракторите ги имаат регистрирано, треба само да платат осигурување. Во меѓувреме до 3 август тече рокот за легализација на дивоградби изградени на земјоделско земјиште - вели Живка Наумова, раководител на регионална Агенција за поттикнување и развој на земјоделството.

Таа објаснува дека во кумановско, многу земјоделци имаат трактори увезени од Србија, Бугарија, набавени од задруги за кои не поседуваат документи за сопственост. Истото се случува и со земјоделците кои механизацијата наследена од родителите не ја префрлиле на свое име. Доколку не ги легализираат тракторите и приколките фармерите ќе се соочат со казни од над 500 евра. Во декември се посетени повеќето села и на селаните им е објаснета процедурата за легализација на земјоделска механизација.