Зачленете се во нашиот клуб на читатели и најновите текстови ќе ги добивате на вашата мејл адреса
Значително е зголемената потрошувачката на вода во Куманово поради жештините. Од Филтер станицата на ЈП „Водовод“ велат дека засега се испорачуваат доволни количина на вода од 380 литри во секунда, но се случува во попладневните и вечерни часови да се намали притисокот во одредени делови од градот.
Сепак, тврдат дека досега до Водовод нема поплаки дека одредени делови на градот се без вода за пиење.
„Во моментов испорачуваме во просек по 380 литри во секунди дневно, но во најжешкиот дел од денот или во попладневните часови потрошувачката е повеќе од 400 литри. Во текот на ноќта паѓа и на 200, па отука се земаат просечните вредности. Нема стигнато поплаки, но се случува во повисоките зони или на погорните катови на зградите да има помал притисок. Тоа не е ништо ново, вообичаено е за овој период од годината и овие температури“, објаснува Тони Јовчевски, раководител во Филтер- станица.
Поради застареноста на мрежата се јавуваат и дефекти, на секоја пријава итно се реагира и се постапува во најкраток можен рок. Според официјалната страница на претпријатието за денеска се пријавени два дефекти, во приватни стамбени објекти, едниот на улицата „Боро Менков“, вториот во населбата Бабин Дол.
Надлежните појаснуваат дека има доволни количества на вода, акумулационите езера и алтернативните извори во целост можат да ги задоволат потребите на граѓаните. Од претпријатието апелираат до потрошувачите да се однесуваат рационално со водата за пиење и да не ја користат за разладување на улиците, полевање на бавчите и дворовите или полнење на базени.
„Водата мора да стигне секаде и до секој, затоа мора рационално да се користи“, апелираат од ЈП „Водовод“ Куманово.
Зачленете се во нашиот клуб на читатели и најновите текстови ќе ги добивате на вашата мејл адреса
