×
  • Насловна
  • Вести
  • Регион
  • Македонија
  • Спорт

  • Видео

  • Колумни
  • Интервју

  • По допрен глас
  • Репортажи
  • Ретроспектива

  • Погранична хроника
  • Фото вест - Ваша пошта!

  • Дезинформации
  • ПРОВЕРКА НА ФАКТИ:КОВИД-19
  • Проверка на факти: реформи кон ЕУ

  • Контакт
  • Политика на приватност
  • Импресум
  • Маркетинг стратегија
  • Понуда за рекламирање

  • Не постојат неосвоиви тврдини, постојат само лоши напаѓачи !!!

    Мартин Костовски

    Почитувани мои сограѓани, дали барем еднаш во текот на денот сте се запрашале, колку малку ни е потребно во животот да бидеме среќни, а колку е чудно, колку тоа малку ни недостасува.

    Секој од нас-обичните луѓе, во средношколските клупи или во факултетските амфитеатри, па и на улицата се имаме сретнато со историјата на народите, односно сме имале можност да чуеме за нивните држави, религии, уредувања и традиции. Поаѓајки од древните цивилизации Месопотамија, Египет, Персија, Кина, преку античка Грција и Александровата Македонија, па преку Римската империја, Христијанството, Средниот век, хуманизмот и ренесансата, националните држави.....па се до ден денес во време на модерни и современи држави кои се демократски уредени, - научивме дека секој си го чува, брани и сака своето.

    Меѓутоа, за да се сака, чува и брани својата држава, народот и религијата треба да се идентификуваш со нив, да бидеш неразделив дел од нив, нивната суштина и бит. Ако е таква работата, сега се прашувам дали големите фараони од Египет, големите императори на Рим и големите војсководци од Средниот век биле барем малку слични со нашиот ни Премиер - ”чувар на нашата тврдина”.

    Денеска нашиот фараон, крал, император, цар, месија, да не заборавив нешто, а да се извинувам нашиот војвода, генерал, капетан, војсководец...итн.итн...,(којзнае што уште не) навистина ја брани, сака и чува нашата тврдина (Република Македонија). Тврдина во која живеат 2 милиони верни поданици, кои верно му служат на својот чувар, задоволни од благодетите што ги дава животот внатре во тврдината. Едноставно животот е преубав, насекаде среќни, задоволни и насмејани лица. Па како и нема да бидат кога уште малку и оваа наша тврдина ќе биде центар на светот, ветена земја, силиконска долина, најпосакуваното место за живеење. Но, само да расчистиме уште со Американците, Европјаните, Грците и уште со по некои поситни и послаби непријатели и се ќе биде во ред, а да се разбереме ние имаме многу непријатели...

    Мислите нашиот “чувар на тврдината” не може се справи со сите нив? Па тој не е наивен како Милошевиќ, Садам Хусеин, или некој од диктаторите од Арапскиот свет на пр. Гадафи. Нашиот “чувар на тврдината” изнајде брилијантна офанзивно-дефанзивна тактика за одбрана и победа на тврдината, која гарант е победничка.

    Му текна да ги доведе скоро сите познати херои од македонската историја на едно единствено место “Скопје 2014”. Затоа сега е лесно, кој може со нас, па тука се Александар Македонски со фалангата и со неговиот татко Филип, па Гемиџиите, Гоце Делчев и Даме Груев, со нас се Ченто и Карпош, па лавовите и бикот, сите спремни ко затната пушка. Ако недај боже, нешто не оди по планот, на бојното поле напаѓа Шмизлата.Таа ќе го заведе непријателот со својот шарм и сексапил, ќе го стави на колена, по што нашиот “чувар на тврдината” ќе ги покрене војската од Музејот на ВМРО да го докрајчат опиениот од занес непријател.

    Доаѓањето на нашите “СПАСИТЕЛИ” во денешницата е навистина многу, многу ама многу скапо, можеби и затоа до сега ниеден чувар на тврдина во светот не успеал да направи такво нешто. Ама нашиот успеа, и тоа многу едноставно - СО ПАРИТЕ НА СВОИТЕ ПОДАНИЦИ, точно 2 милиона на број.

    Сега не е битно што поданиците живеат се помизерно, посиромашно и понесреќно, не е битно што секој ден се чудат како да ги платат сметките за струја, храна, облека, бензин, кои енормно растат. Се извинувам, да не ја заборавам дека стига и по некојата казничка во меѓувреме, а СЕПАК ДАЛЕКУ Е ПРВИ.

    Според таа логика не е битен мизерниот животот на поданиците со победничкиот план на“чуварот на тврдината” – па на крајот на краиштата тие се само поданици, кои не мораат да јадат, да се грејат и да се облекуваат секој ден, тие мора да слушаат, да гладуваат и работат се за својата тврдина и својот чувар.

    Ама, кога ќе победи „спасителот„, тогаш сите заедно победнички ќе поминеме низ Триумфалната порта која си ја има направено и ќе заборавиме на сметките, на храната и на сиромаштијата, “чуварот на тврдината” на се мисли. Секоја чест!

    Сега сигурно заради исполнување на генијалниот план “чуварот на тврдината” ќе побара уште еден мандат од 4 години за да ја одбрани тврдината. За да можеме 2014 година сите да се комплетираме, спремни, посилни и побројни да се справиме со непријателот за век и векови.

    Но, чувару на тврдината, ова се ми изгледа како во песната на групата Бело Дугме-“СВЕ У КОРИСТ ТВОЈЕ ШТЕТЕ, САМО ТВОЈЕ АЛ И МОЈЕ”. Епа се извинувам, ама јас како твој поданик од тврдината, еден од 2-та милиона ќе ти се спротивставам на планот и ќе се вклучам во одбрана на нашата тврдина, со борба против твојата. Се ставам целосно на страната која ќе се бори против сиромаштијата, невработеноста, несигурноста, колективната апатија и летергија, против несреќата и болката на поданиците во тврдината.

    Ќе бидам на страната која ќе ја победи твојата политика и неправда - ТВОЈАТА ТВРДИНА ЌЕ ПАДНЕ !!!

    Ќе падне  бидејќи “Голема е несреќата кога човекот не знае што сака, а вистинска катастрофа е кога незнае што може” – ти нити знаеш, а уште помалку можеш да ја одбраниш и чуваш нашата тврдина.

    Твоето заминување “чувару на тврдината” – Премиере Никола Груевски – е она малку што им недостига на поданиците, за да бидат среќни. Оди си – дозволи им на луѓето да бидат среќни !!!

    Секретар на СДСМ Куманово

    Мартин Костовски Мартин Костовски

    *Ставовите изнесени во колумните не се ставови на редакцијата на KumanovoNews. Затоа KumanovoNews не сноси одоговорност за содржината на истите.*