Зачленете се во нашиот клуб на читатели и најновите текстови ќе ги добивате на вашата мејл адреса
Ракометарите на Вардар Про синоќа стигнаа до триумф во дуелот со Металург во натпреварот од последното коло од Супер лигата и со тоа ја освоија титулата шампион и воедно ја прекинаа тригодишната доминација на тимот од Автокоманда.
Во СРЦ „Кале“ пред повеќе од 2.500 гледачи се водеше голема борба и натпреварот траеше безмалку 2 часа. Една од причините беше и 15 минутниот прекин, кога беа исклучени играчите Игор Абутовиќ (Вардар Про) и Филип Миркуловски (Металург), како и тренерот на Вардар Про Веселин Вујовиќ.
Сметам дека заслужено победивме и дека бевме подобри на овој натпревар. Покажавме подобра игра и го победивме Металург, кој оваа сезона имаше одлична сезона во Лигата на шампионите-изјави Вујовиќ.
„Црвено-црните“ имаа контрола над резултатот во текот на целиот натпревар, откако по 3:3 направија серија од 4:1 кога Металург не реализираше два удари од 7 метри. Потоа резултатот се движеше со предност на Вардар Про од 2-3 голови.
Прекинот беше на една минута и 15 секунди до крајот на првиот дел, по таа ситуација Вардар Про подобро се снајде на теренот и постигна два гола.
Во вториот дел „црвено-црните“ неуспеаја да поведат со пет голови разлика, но ниту Металург не намали на помалку од два разлика. Во таква ситуација на крајот беше 22:19, за нова титула за Вардар Про.
Голманот Милиќ со 11 одбрани и Игор Карачиќ со 8 голови беа предводници кај Вардар Про, додека кај ослабениот Металург Дарко Станиќ имаше 12 одбрани, а Ренато Вугринец постигна 7 голови.
Вардар Про како шампион ќе игра во групите од Лигата на шампионите, а Металург доколку Македонија не добие „вајлд карта“ за квалификациите од ЛШ ќе игра од ЕХФ Купот.
Зачленете се во нашиот клуб на читатели и најновите текстови ќе ги добивате на вашата мејл адреса
