Ракометарите го пречекуваат Спартак, ракометарките домаќини на Гевгелија

Ракометарките на Куманово одиграа одличен натпревар минатото коло, каде што без носителот на играта Александра Боризовска, успеаа да одиграат нерешено против тимот на Металург на гостински терен со резутлат 21:21. Мила Трајковиќ постигна 11 гола на тој натпревар и беше носител на играта на Куманово во овој специфичен момент за нив.

Во недела во 16:30 тие ја пречекуваат екипата на Гевгелија која досега има само една победа, два нерешени натпревари и петнаесет порази. Младиот тим уште на натпреварот со Деспина покажа дека има квалитет, а резултатот со Металург само го потврдува тоа. Натпреварот ќе се игра во салата на ОУ Христијан Карпош.

Ракометарите на Куманово го пречекуваат тимот на Спартак кој се наоѓа на дванаесетата позиција на табелата со три победи, два нерешени натпревари и десет порази. Куманово минатиот натпревар ја искористи предноста на домашен терен против поквалитетната Струга, па ова е шанса кумановчани да забележат нова победа во првенството. Тие играат во недела во Спортската сала со почеток во 17 часот.