Сан Антонио се пласираше во финалето

Спарс овој дуел го добија со 93:86, а феноменален меч одигра Тони Паркер кој постигна 37 поени кои ги надополни со 6 асистенции.

Ова е неверојатно чувство. Многу е тешко да стигнате до финалето и да освоите шампионски прстен. Јас имав 21 година кога прв пат ја освоив титулата и мислев дека ќе биде многу лесно и дека тоа ќе се случува секоја година. Во 2007 ја освоив мојата трета титула во последните 5 години.Оттогаш поминаа шест години и секоја наредна сезона е се потешка и потешка. Секој тим сака да те победи. Затоа ова е толку неверојатно, да се вратите на врвот по толку време со истиот тренер и со истата „голема тројка- изјавил Паркер по мечот.

Во гостинскиот тим двоцифрен број на кошеви постигнаа Тим Данкан (15) и Каваи Ленард (11).

Зек Рендолф одигра уште еден просечен натпревар за Мемфис со само 13 поени и шут 4/13. Зи Бо во оваа серија со Спарс просечно постигнуваше по само 11 поени, за разлика од пресметките со ЛА Клиперс и Оклахома каде неговиот просек беше 19,7 поени.

Најзабележителен кошаркар во домашниот тим беше резервистот Квиси Пондекстер кој реализираше 22 поени.

Ова за „мамузите“ е петта титула во конференциското финале на Западот, а во претходните четири наврати ја освојуваа и шампионската титула. „Мечките“ пак ја одиграа најдобрата сезона во нивната историја.

Тимот на Грег Попович во големото финале ќе игра со подобриот од дуелот Мајами и Индијана, каде моментално актуелните шампиони водат со 2:1 во меѓусебната серија.