12 милиони денари општината ќе потроши за културни манифестации

И за следната година остануваат брендовите како Денови на комедија, Тамбурашки фестивал, Рома труба фест, детски фестивали, прослава на празниците на етничките заедници и друго. Пари ќе бидат одвоени за младите уметници и таленти, како и за прикажување на повеќе театарски претстави во Куманово.

“Предвидени се пари за млади таленти, уметници, и за презентација на кумановската култура во Македонија и во странство. Културно - уметнички друштва и поединци кои имаат понуди за гостување во странство, така што имаме и тука ставка 500.000 денари. Предлагаме да го збогатиме театарскиот живот во Куманово, затоа  што во изминативе неколку години кумановци имаа можност само да ги проследат премиерните претстави на нашиот кумановски театар кои за жал се во многу помал број. Ќе понудиме соработка со Центарот за култура, театарот да заеднички овозможиме гостување и на други претстави од македонските театри и оние кои сакаат граѓаните да ги гледаат“ - изјави Жика Крстевски, раководител на сектор за култура и спорт во општина Куманово.

За годинава и за наредната одвоените средства од општинскиот буџет за култура се идентични.