Ќе се гради индустриска зона во Ранковце

Зоната се наоѓа на атрактивна локација на Коридорот 8 меѓу Куманово и Крива Паланка на 40 километри од граничниот премин Деве Баир кон Бугарија и на 50 километри од граничниот премин Табановце кон Србија.

Во индустриската зона предвидена е изградба на 18 градежни парцели во два блока. За изградба на внатрешна патна, водоводна, канализациска и телекомуникациска инфраструктура Владата ќе потроши околу 12 милиони евра.

Во близина се повеќе градови од североисточниот дел на земјата со многу жители кои можат да одговорат на потребите и барањата на инвеститорите за работна сила од најразличен карактер. Во близина се границите со Србија и Бугарија, а на околу 70 километри од аеродромот „Александар Велики", во близина на зоната поминува Коридорот 8, тука е магистралниот пат, но и железничката линија кон Бугарија. Сето тоа им нуди можност на потенцијалните инвеститори да бидат одлично поврзани и да можат да извезуваат со брз и ефикасен транспорт - изјави премиерот.

Преку индустриските зони Владата настојува да привлече странски инвеститори и да креира нови работни места.

Од основани 9 зони во земјава засега функционални се зоните во Скопје и Штип.