Дамјановски отфрла непотизам во СДСМ

Тој тврди дека во Локалната самоуправа во изминатиот период нашле вработување 30 луѓе од помалите етнички заедници, припадници на други политички опции  и луѓе кои воопшо не се партиски определени. Вели дека меѓу вработените има и блиски роднини на високи функционери на ВМРО-ДПМНЕ, како и околу 300 вработени во образованието со партиска книшка на опонентната партија.

Затоа сакам да запрашам, каде работат советниците на ВМРО-ДПМНЕ, нивните сопруги, портпаролот и неговата сопруга, сопругите на пратениците и роднините на нивните најтесни семјства, браќа и сестри? Не можат тие да ја дефокусираат јавноста, да се служат со популистички методи, и да обвинуваат други за непотизам. Затоа ги повикувам заедно да ги разгледаме сите вработувања во изминатиот петгодишен периодот, па да видиме кој, кога и каде вработувал. Притоа ве потсетувам и за избрканите работници од Центарот за социјални работи, на чие место доведовте партиски луѓе. Јас одговорно тврдам дека при вработувањата во општината се запазени професионалните, а не партиски и роднински криетериуми - рече Дамјановски.

Во однос на обвинувањата на советникот на ВМРО-ДПМНЕ, Бобан Николовски дека треба прво да обезбеди паркинг места во градот, па потоа да воведува пајак служба градоначалникот вината ја префрли кај централната власт, обвинувајќи дека Министерството за транспорт и врски две години не издало одобрение на урбанистичките планови во централното градско подрачје, каде е предвидена изградба на катните гаражи.

Сега пак ве прашувам уште колку време ќе ви биде потребно за да ни го дадете земјиштето на користење и да започнеме со реализација на предвидените проекти. Со вакво одолговлекување на постапките, граѓаните сами ќе увидат каде е вината во застојот на капиталните инвестиции -  рече Дамјановски.

Воведувањето на ред во сообраќајниот хаос во паркирањето според Дамкајновски ќе се реши со зонското паркирање и пајак службата, која ќе ги казни возачите кои ги узурпираат јавните површини.