Груевски од кумановци побара поддршка за двојна победа

За да непречено се реализираат проектите од програмата “Проверено“ тој очекува освојување на најмалку 62 пратенички места и убедлива победа на Ѓорѓе Иванов на претседателските избори.

Нашите проекти предвидуваат реконструкција на патот Куманово - Романовце, изградба на спортски сали, тениски игралишта во Куманово и едно повеќенаменско игралиште во село Пчиња. На пругата кон Бугарија, ќе има три железнички станици во Куманово, Шупли Камен и Бељаковце, а стојалишта ќе се изградат во Лопате, Перо Чичо, Доброшане, Проевце, Клечовце и Довезенце. Реконструкција на пругата од Бељаковце до Крива Паланка со градење или доградување на 33 постојни мостови, изградба на 11 нови мостови - изјави Груевски.

На кумановчани им се обрати и носителот на листата во втората изборна единица Гордана Јанкуловска.

За Куманово нудиме изградба центри за палијативна грижа на стари лица што во моментов постојат единствено во Скопје и Битола, ќе ги унапредиме условите за реализација на културните активности, ќе извршиме реконструкција на далноводот со што ќе се зголеми стабилноста на електроенергетскиот систем, во делот на термоминералните води и рекреативниот туризам планираме да дадеме под концесија некои од постоечките локации меѓу кои една е во Куманово и ќе предвидиме изградба на модерен туристички комплекс-рече Јанкуловска.

Кандидатот за претседател Ѓорѓе Иванов истакна дека наша цел е Македонија да биде економски силна и развиена држава, поволна дестинација за странски инвестиции како и добар сосед и членка на ЕУ и НАТО.