Меморијален турнир во ракомет „Јасмина Голубовиќ“ - утре во Куманово

Меморијалниот турнир во ракомет „Јасмина Голубовиќ“ утре по 4 пат ќе се одржи  во салата на средното училиште „Перо Наков“ во Куманово. 

Најавено е учество на 8 екипи, 5 женски и за прв пат 3 машки. Натпреварите почнуваат во 10 часот.

„Ќе се одиграат вкупно 12 натпревари, а за прв пат во турнирот се вклучуваат и екипи од машкиот ракомет, што ни претставува особено задоволство. Официјалната програма ќе се одржи нешто подоцна од стартот на натпреварите, а на присутните ќе се обрати блиска роднина на легендарната Јасе. За жал, ова година не можеа да допатуваат најблиските членови на нејзиното семејство“, објасни Елена Радиќ, член на клубот на ракометни ветеранки, кои го организираат турнирот.

На турнирот ќе учествува, освен тимот на организаторките и „Ветеранки Стружанка Струга“, „ЗРК Ветерани Југ Гевгелија“, „Ветеранки Богданци“ и „Ветеранки Житомел- Куманово“. Во машка конкуренција ќе играат ветераните од Прилеп и Куманово, како и „Зрвр Македонија“ каде играат и поранешни државни репрезентативци. 

Со турнирот се оддава во чест на прерано починатата ракометарка од Куманово, Јасмина Голубовиќ, но се испраќа и силна порака на младите „Годините не се пречка , победи ако можеш , изгуби ако мораш но не се откажувај никогаш “.

Турнирот се организира со поддршка на Општина Куманово, кои издвоиле 30.000 денари за настанот.

Трофеите за победниците се донација од Општинскиот сојуз на спортови.