Парична помош за семејствата од поплавените села

 Двесет и едно семејство од селата Бељаковце, Довезенце. Јачинце, Клечовце и Шупли камен чии земјоделски имоти и куќи беа поплавени од Крива река и Живуша на почетокот на овој месец ќе добијат еднократна парична помош од буџетот на Општината Куманово.

 Советниците денеска дадоа согласност да им се исплати  по 20.000, 15.000 и 10.000 денари, зависно од висината на штетата што им е нанесена од поплавата. Ова е одлука беше донесена врз основа на увидот на посебна Комисија на Општинскиот штаб за заштита и спасување направен во првите неколку дена од поплавата. Од излевање на водата од споменатите две реки штети претрпеа 14 домакинства во Јачинце, три  во Шупли камен, две во Довезенце и по едно домакинство во Клечовце и Бељаковце. Советот на општината усвои и соодветни заклучоци за превентивни мерки од идните поплави на овие подрачје со акцент на редовно и одржување на речните корита и чистење на каналите на наводнувачките системи во Општината што се во надлежност на Водостопанското претпријатие ,,Кумановско-липковско поле‘‘.