Сиромаштијата им го зеде лебот на оџачарите

Оџачарот Бобан Јаневски вели дека дневно во просек чисти по еден оџак, но работа за оџачарите има се помалку иако услугите се ефтини.

 “Чистење оџак е од 200 до 600 денари, зависно колку работа има, дали е зграда или куќа. Не е скапо, но граѓаните немаат пари и за да заштедат сами си ги чистат оџаците. Порано беше поинаку. Сите беа вработени, земаа плати, а немаа време за чистење оџак и викаа оџачар. Од ова не може да се живее, и затоа бараме начини, преку лето нешто друго да работиме“ - рече Јаневски.

Најдобро е оџакот да се исчисти во октомври пред почетокот на грејната сезона, за да не дојде до запалување и предизвикување на пожар.

И вториот оџачар кој го консултиравме, Енвер Јашари потврдува дека оџаци граѓаните многу ретко чистат со стручно лице.

“Не паметам кога последен пат ме викнале да чистам оџак. Мојот оџак дома е последен кој сум го чистел. Треба оџак да се чисти секоја година, а не како што прават граѓаните еднаш во 2-3 или повеќе години“ - кажа Јашари.

За неисчистен оџак на граѓаните им следи казна од 500 до 1000 евра согласно законските прописи.