Средата се враќа на добиточниот пазар ?

 Пазарот финансиски добро работи, меѓутоа со години претставува ,,чир‘‘ за месното население на Долно Kојнаре и за поширокото опкружување. Главен проблем е што секоја сабота околу Пазариштето се создава голем метеж од крупен и ситен добиток, трактори, камиони, лесни возила и луѓе, а згора и диви пазарџии со распослани ситнурии - алати, вреќи со жито, грав, арпаџик, кучиња, кокошки и петли, јајца и друго. Буквално, секоја слободна педа околу единственио приод на Пазариштето е зафатена. Мостот како единствен приод и влез на пазарот е вистинско тесно грло бидејќи по него нема теорија да се разминат две поголеми товарни возила. Посебна приказна е кога по мостот треба да помине возило на Брза помош или противпожарна интервенција. Нешто мора да се презема, велат жителите од Долно којнаре, а особено тие што имаат куќи во непосредна близина на пазарот. Добро е што на тоа мислење е и управата ЈП ,,Пазаришта‘‘, а добија поддршка и од Советот на Општината Куманово. Во предвид се две алтернативни решенија: проширување на постојниот мост, или отворање на поодамна планираниот нов приод со уште еден мост, околу 500 метри подолу од сегашниот. Според оваа алтернатива долниот мост би бил влез, а сега постојниот излез од Добиточниот пазар. На вакво решение инсистира и Месната заедница во Горно Којнаре.

Што се однесува до граѓаните со куќи покрај самиот пат и до Земјоделското училиште ,,Киро Бурназ‘‘ најдобро решение е Добиточниот пазар воопшто да го нема. Дотолку повеќе што ЈП  ,,Пазаришта‘‘ излегува со предлог - решение да се врати средата како пазарен ден, односно како што беше некогаш во ,,старите добри години‘‘ кога кумановскиот пазар вриеше од добиток од широкиот региона од Прешево и Бујановац до Кочани и Штип. Кога средата повторно би се вратила како пазарен ден, најмногу ќе биде погодено Земјоделското училиште, доколку претходно не се обезбедат пристапните решенија.