Светосавска академија за празникот на Србите

На академијата настапија ученици од основното училиште „Светозар Марковиќ„ од Старо Нагоричане и културно-уметничкото друштво „Српски вез„ од Куманово, како и други уметници. Присутните ги поздрави заменик министерот за култура Драган Недељковиќ во името на Владата.

- Седма година како „Свети Сава„ е национален празник на Србите во Република Македонија. Ние ја имаме таа среќа, бидејќи единствено ние „Свети Сава„ го славиме како национален празник, додека во другите земји, па и во матичната, тој се слави како училишна и верска слава. Ние тоа секаде го потенцираме, и кажуваме дека државата ни овозможи како мала етничка заедница да имаме свој национален празник, - изјави Недељковиќ.

Претседателот на Српската заедница во Куманово Горан Зафировиќ им го честиташе празникот на присутните, потсетувајќи на делата на големиот учител и градител Свети Сава.

 Свети Сава  зад себе остави многу градејќи цркви и манастири и затоа го славиме со векови и ќе го славиме додека постои српскиот народ. Со голема почити вечерва се слави во Куманово, а се празнува и во повеќето градови во Македонија. Утре ќе се одржи свечена академија во Скопје, -рече во обраќањето Зафировиќ.

На академијата присуствуваа истакнати личности од политичкиот и културен живот на Србите во Куманово и Македонија, како и амбасадорката на Србија во РМ.