Во Куманово изградени над 26,5 илјади дивоградби, повеќето легализирани

Рокот за поднесување на барањата за легализација е завршен кон крајот на 2018, но се уште се работи интензивно и се постапува по доставените барања од граѓаните.

„Постојано се достaваат документи кои треба да се потпишат во моментов - дел од нив се испраќаат за барање на мислење во различни институции, за дел се изработува урбанистичка согласност, а некои се и во фаза на решение. Има доста тековни предмети на кои се работи интензивно“, изјави Емилија Сларидис Јаневска, раководител на Секторот за урбанизам на Општина Куманово.

Таа додава дека барањата за легализација главно се со позитивни решенија, затоа што со тоа не се нанесува финансиска штета на граѓаните за уривање на веќе изградени и најчесто и населени спратови или доградби на приватен имот. Од тоа има бенефит и општината- подоцна се наплаќа данок на имот на легалзираните објекти, со што се полни локалниот буџет.

Некомлетна документација е главната причина за одбиените предмети.

„Нема многу одбиени барања, некаде околу 3-4 илјади се одбиени поради некомплетна документација, најчесто одсуство на елаборати. Инаку во самата постапка ретко кога се одбиваат барањата на приватните лица“,објаснува Сларидис Јаневска.

Што се однесува до јавните институции и објекти кои исто така се нелегално изградени за нив е надлежно Министерството за транспорт и врски. Најчесто се работи за училишни згради, административни згради, театри - точната бројка не е позната за локалната власт, затоа што постапките за објекти од државно значење од прва категорија се водат на национално ниво.