Дезинформација е дека „вакцината шири вирус“

Од само една болница во Велика Британија и состојбата со хоспитализациите во еден ден, не може да се извлече заклучок дека вакцината шири вирус. Во државата 37.650.239 луѓе примиле трета доза вакцина. Британските здравствени власти во своите извештаи наведуваат дека бустерот на Фајзер кај постари од 50 години е ефикасен против хоспитализација кај 98,8 отсто од луѓето кои претходно примиле две дози АстраЗенека или Фајзер

Смртните случаи од ковид не растат со бројот на вакцинираните

Вакцинацијата не допринесува за смртноста во Северна Македонија, а за тоа има повеќе показатели. Како еден од тие показатели е фактот што смртноста во државата почна да расте уште пред воопшто да постои вакцината и земјава за првпат во 2019 година влезе во состојба на негативен природен прираст. Секојдневните статистики од Министерството за здравство покажуваат поголема смртност меѓу невакцинираното население

Вакцинираните не добиваат свој број и нема докази дека за неколку години ќе паѓаат како мушички

Не е точно дека на лицата коишто се вакцинирани против ковид-19 им е доделен каков било број и тоа од сопствено искуство им е познато на сите кои се вакцинираа во Северна Македонија. Граѓаните кои решаваат да се вакцинираат, потпишуваат изјава со писмена согласност и не добиваат број. На нивниот вакцинален сертификат единствено се впишани бројот на серијата и производителот на вакцината, како и датумот на аплицираната доза. Што се однесува на тврдењето на свештеното лице дека за две до три години луѓето кои примиле вакцина ќе починат и ќе паѓаат на улиците, по што свештениците нема да можат да постигнат да ги закопаат, за ова тврдење нема ниту научни докази, ниту пак, е можно да се докаже. Од она што досега се знае, барем за С. Македонија, е дека од сите вакцинирани граѓани, за сомнение дека починале како резултат на вакцината пријавени се две лица во државата. Досега после овие две пријави не е утврдена причинско-последична врска меѓу вакцинацијата и смртта

Во вакцините против ковид-19 нема „зачудувачки нечистотии“

Вакцините против ковид-19 не содржат никакви нечистотии, како што се тврди во постот што е предмет на нашата анализа. Во вакцините против ковид-19 нема никакви објекти, ниту живи организми, ваквите тврдења не се научно поткрепени, ниту пак, се докажани. Текстот што се споделува во постот е преземен од веб сајт што шири антиваксерски теории на заговор и дезинформации, познат по промовирање на алтернативна медицина, псевдонаука и десничарски екстремизам

Не е точно дека вакцината на Фајзер нема трајно одобрение за употреба

Вакцината на Фајзер од август 2021 година е целосно одобрена за користење. Таа стана првата вакцина во светот која доби целосна дозвола за употреба од aмериканската Aгенција за храна и лекови (ФДА). Комесарот на ФДА, Џенет Вудкок, рече дека јавноста може да биде сигурна дека вакцината ги исполнува највисоките стандарди на безбедност, ефикасност и високи стандарди во начинот на производство

ПЦР тестирањето не е прикриена програма за вакцинација

Тестот за детекција на коронавирусот не е назална вакцина и со него не се врши присилна вакцинација. Всушност, вакцините не функционираат на таков начин и нема никаква теоретска можност да се вакцинирате преку брис од нос и грло.Тестирањето, пак, игра клучна улога при справувањето со пандемијата бидејќи заразените лица кои навремено ќе се тестираат и самоизолираат не го шират вирусот на други луѓе

Нема докази дека вакцината на „Фајзер“ предизвикува згрутчување на крвта

Не постојат медицински докази дека вакцината на „Фајзер“ ја оштетува човечката крв, односно, дека ја онеспособува да го носи кислородот низ крвотокот. Консензусот на медицинската заедница која третира пациенти со ковид, не соодветствува со ова тврдење

Нема графен оксид во вакцините на „Фајзер“, „Синофарм“, „АстраЗенека“ и „Спутник“

Наспроти произволните тврдења искажани во постот дека вакцините против ковид-19 се отровни и содржат „графен оксид и микротехнологија”, тие се авторизирани, ги имат поминато сите неопходни контроли и се одобрени за употреба. Медицински експерти ширум светот се категорични дека во вакцините нема вакви состојки, а тоа го покажуваат и официјалните извештаи од медицински професионални здравствени агенции. И на официјалната веб-страница за вакцинација во земјава, каде се наведени состојките на сите вакцини кои се администрираат во Северна Македонија, се гледа дека во нивниот состав нема графен оксид

Не е точно дека невакцинираните не умираат

Не е вистина дека граѓаните кои нема да примат вакцина против ковид-19 немаат ризик да починат. Тоа е евидентно од статистиките на Институтот за јавно здравје кои секојдневно се споделуваат со јавноста, а кои покажуваат дека поголемиот дел од починатите лица се невакцинирани

Американската агенција за храна и лекови не брише документи за вакцината на „Модерна“

Oвој документ постои и не е отстранет, ниту пак избришан. Станува збор за извештај насловен како The summary bases for regulatory action кој американската Агенција за храна и лекови го објавила на 30 јануари 2022 година. Оттаму, ниту ФДА отстранила некакви докази од својата веб страница, а кои се поврзани со вакцината на Модерна, ниту пак го крие фактот дека ризик за миокардитис и перикардитис постои кај млади мажи и тоа со проценета стапка од 148 случаи на милион администрирани втори дози

Не е точно дека половина од полицајците во Отава дале оставки

Ниту еден од две илјади полицајци во оваа служба не дал отказ поради протестите за вакциналните мандати, изјави претседателот на полициската академија на Отава, Мет Скоф за „Асошиејтед Прес“

Фаучи не изјавил дека не треба да се носат маски додека доминираше делта сојот на ковид-19

Оваа изјава навистина ја дал Фаучи, но не е точно дека тој го кажал ова додека делта сојот на коронавирусот преовладуваше во светот. Изјавата на Фаучи e дадена на 8 март 2020 година и не го претставува неговиот моментален став за носењето заштитни маски. Петличковски, пак, изјавата за носењето маски ја дал на 4 февруари 2022 година, во контекст на варијантата омикрон која моментално е најдоминанта

Од небо нè не запрашуваат со коронавирусот, а детектирањето на новите соеви е со секвенционирање

Нормално е вирусите со текот на времето да се менуваат и еволуираат додека се шират меѓу луѓето. Секојпат кога вирусот се реплицира (прави копии од себе), постои потенцијал да има промени во неговата структура – „мутации“. Единствениот начин да се идентификуваат и карактеризираат новите варијанти е со геномика. Секвенционирањето на целиот геном е важен метод за генетско карактеризирање на вирусите со кој може да се направи споредба со други циркулирачки соеви. Коронавирусот се пренесува преку вдишување на респираторни капки од некој што е заболен, кои се исфрлаат преку кашлање, кивање, зборување и пеење, кога лицата се во близок контакт помал од еден метар. Така што, невозможно е инфекцијата да се случи со пуштање на вирусот од авион и од огромна височина

Вакцините против ковид-19 не се ,,лажни” и не се услов да се задржи работното место

Не само што е дезинформација дека граѓаните ќе мора да примат меѓу 2 и 4 „лажни вакцини“, а во спротивно ќе загубат работно место, како што се тврди во постот, туку во Северна Македонија повеќе од половина од населението нема примено ниедна вакцина! Камоли две или четири. Во С. Македонија, никој не принудува никого да се вакцинира. Вакцината против ковид-19 е доброволна и се дава писмена согласност пред да се администрира на кого било во здравствените вакцинални пунктови. Теоретичарите на заговори, од почетокот на вакциналната кампања се насочени кон пласирање вакви и слични нелогичности и тези кои немаат втемеленост во реалноста. Наративот дека нов светски поредок сака да воведе доминација врз населението има за цел да се обесхрабрат  граѓаните од вакцинацијата која спасува животи, спречува тежок тек на болеста предизвикана од коронавирусот и може да спречи појава на нови поопасни соеви

Лага е дека СЗО плаќа за евидентирање на починатите од ковид-19

Семејствата на починатите не одредуваат што е причината за смртта по пат на избор, туку тоа го прават лекарите, овластените и стручни медицински власти, согласно дијагнозата и текот на хоспитализацијата, а за сето ова постои комплетна документација во здравствените установи

Не е точно дека кардиоваскуларната болница во Охрид ќе работи како ковид центар

Набрзо по пласирањето на веста за наводното отворање на Специјализираната болница за кардиоваскуларни заболувања Охрид како ковид центар, стигна демант од оваа јавно-здравствена институција. Оттаму демантираат дека од почетокот на наредната недела ќе отворат оддел за лекување на ковид пациенти