Изабела Павловска од СДСМ доби уште еден мандат да го води Советот на Општина Крива Паланка

03.11.2021 14:11 | Жаклина Цветковска

Изабела Павловска, носител на листата на СДСМ на локалните избори и досегашна претседателка на Советот на Општина Крива Паланка, ја доби довербата да раководи со овој орган и во наредните 4 години.

Изабела Павловска од СДСМ доби уште еден мандат да го води Советот на Општина Крива Паланка

„Изразувам благодарност за дадената можност повторно да раководам со Советот на општината. Не чека многу работа, затоа подавам рака кон секој од вас и барам поддршка за конструктивни предлози во интерес на граѓаните. Во изборната кампања се запознавме со проблемите на локалната заедница и се надевам дека успешно ќе соработуваме и ќе носиме правилни одлуки“, рече
Павловска.

Предлогот за Павловска го даде советничката група на СДСМ, која освои 11 советнички места, ВМРО-ДПМНЕ и коалицијата имаат 7 советници, а ЛДП и ДОМ се претставени со еден советник.

За предлогот на Павловска гласаа советниците од СДСМ, против беа советниците на ВМРО-ДПМНЕ, а советникот од ЛДП и ДОМ беше воздржан.

Покрај Павловска, за претседател на Советот беше предложен и советникот Дане Милошевски од ЛДП и ДОМ, кој доби 8 гласа за и 11 против.

По конституирањето на новиот Совет, пред советниците се обрати и новиот градоначалник Сашко Митовски, кој истакна дека новиот советнички состав е спој на искуство, младост, професионалност, креативност и мудрост.

„Се надевам дека ќе бидеме препознатливи по доброто работење, ставање на сите ресурси во служба на граѓаните и надминување на партиските интереси, во интерес на потребите на граѓаните. Секој почеток значи нови можности и перспективи, а наша одговорност е да ги трансформираме визиите на граѓаните во реалност“, посочи Митовски.

2008 - 2021 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk