Зачленете се во нашиот клуб на читатели и најновите текстови ќе ги добивате на вашата мејл адреса
Машката селекција во деветото коло поразена од Данска со 2,5-1,5, женската од Нигерија со 3,5-0,5.
Црно деветто коло за двете селекции на Македонија на јубилејната 40. Шаховска олимпијада во Истанбул: машката поразена со 2,5-1,5 од Данска, женската декласирана со 3,5-0,5 од Нигерија. Данците, рангирани десет места повисоко на стартната табела, на која Македонците беа 49., се чинеа добра можност за анулирање на поразот од САД, но потклекнаа двете долни табли, кои имаа голема заслуга за извонредните први седум кола. Интермајсторите Филип Панчевски (рејтинг 2461) и Атанас Кизов (2418) го претрпеа својот прв пораз на турнирот - првиот со црни фигури на третата табла против велемајсторот Алан Стиг Расмусен (2496), а вториот на последната во дуелот со ИМ Јакоб Ванг Глуд (2498). На втората табла ВМ Трајко Недев (2494) го совлада ВМ Јакоб Огорд (2517), а на првата ВМ Владимир Георгиев (2566) ремизира со ВМ Суне Берг Хансен (2577).
Вториот пораз едноподруго ги спушти избраниците на капитенот Драгољуб Јаќимовиќ на 32. место во конкуренција на 157 машки состави. Македонија има 11 меч-бода и 21 поен освоен по табли, а во синоќешниот претпоследен круг за противник ја имаше Словачка.
Дамите, пак, целосно се посрамотија против аутсајдерот Нигерија - само половина поен против тимот рангиран дури 47 места подолу, односно на 115. позиција меѓу 127 селекции, згора на тоа со само две рејтингувани шахистки!? На првата табла ЖИМ Габриела Коскоска (2094) не ги искористи белите фигури против Олуватобилоба Олатунџи (1818), а на другите загубија Бојана Бејатовиќ (1978) од Нсисонг Асанга, Драгана Николовска (1828) од Олуфунмилајо Акинтола (1747) и Симона Лакинска (1655) од Вивијан Ѕаем.
Со седум меч-бода и со 14,5 поени по табли, избраничките на селекторот Ристе Менкиноски паднаа на 89. место. Синоќа требаше да играат со Јапонија.
Резултати од деветтото коло, мажи: САД (5. по рејтинг) - Русија (1.) 2,5-1,5; Филипини (35.) - Кина (6.) 0,5-3,5; Ерменија (3.) - Германија (14.) 2,5-1,5; Полска (16.) - Азербејџан (7.) 2-2; Украина (2.) - Франција (8.) 3-1; Холандија (9.) - Израел (12.) 3-1; Србија (20.) - Аргентина (29.) 1,5-2,5; Унгарија (4.) - Италија (22.) 3-1; Грузија (26.) - Индија (13.) 2-2; Виетнам (27.) - Англија (11.) 3-1 итн.
Табела: Кина, Русија, Ерменија и САД по 15 меч-бода, Украина, Холандија и Аргентина по 14 итн.
Зачленете се во нашиот клуб на читатели и најновите текстови ќе ги добивате на вашата мејл адреса
