“Форум на работодавачи“ пред кумановци

Како најпопуларни мерки ги наведе субвенционирање при вработување, вработување на инвалиди, обука кај познат работодавач и финансиска поддршка за микро и мали претпријатија.

Според податоците на Државниот завод за статистика најголем број од претпријатијата се микро со 5 до 9 вработени. Да ги насочиме да го прошират својот бизнис од микро да станат мали и од мали да бидат средни. Максимум може да вработат 5 лица за кои им се даваат 92.000 денари по човек неповратни средства. - изјави Младен Фрчковски, советник во МТСП.

Тој посочи дека треба да се направат анализи за да се види која струка е дефицитарна во градот. Претходно дефицитарни во Куманово биле изработувачите на горен дел од обувки, но кадрите по поминување на обука тешко наоѓале работа.

Работодавачите се пожалија дека апликациите многу бавно се обработуваат и дека целиот процес треба да оди побрзо за да не чекаат со месеци. Имаше и такви кои се многу задоволни од мерките за вработување.

Вработен сум со 20 плати неповратни како инвалидизирано лице. Се вработив во своја фирма и го проширив бизнисот годинава со една продавница, а 2014 година планирам за уште една или две да се проширам. Продавам санитарија, бела техника. Програмите се корисни.- рече Ацо Јаневски.

Проектот “Форум на работодавачи“ го организираат МТСП, АВРМ, Национален совет на претприемачи во соработка со локалните самоуправи во земјава.